Þrír gististaðir innan Ferðaþjónustu bænda hljóta viðurkenningu Vakans



Þrír gististaðir innan Ferðaþjónustu bænda hljóta viðurkenningu Vakans

01.12.2015
Bryndís Pjetursdóttir
Þrír gististaðir innan Ferðaþjónustu bænda hljóta viðurkenningu Vakans

Þrjú gistiheimili innan Félags ferðaþjónustubænda fengu viðurkenningu Vakans á Uppskeruhátíð Ferðaþjónustu bænda sem haldin var hátíðlega þann 16. nóvember síðastliðinn á Hótel Natura. Þetta voru Gistihúsið Narfastöðum, Brunnhóll og Sólheimahjáleiga sem nú flokkast öll sem fjögurra stjörnu gistiheimili. Að auki fengu Narfastaðir gullmerki í umhverfiskerfi Vakans og Brunnhóll bronsmerkið.

Markmið Vakans er að efla gæði, öryggi og umhverfisvitund í ferðaþjónustu á Íslandi. Gæða- og umhverfisviðmið Vakans fela í sér viðameiri úttektir á starfsemi fyrirtækja í ferðaþjónustu en áður hefur þekkst hér á landi

Narfastaðir – Laugum Þingeyjarsveit

 
Narfastaðir
 Á mynd frá vinstri: Alda Þrastardóttir frá Ferðamálastofu, Sigríður Diljá Vagnsdóttir sem tók við viðurkenningu Narfastaða og Áslaug Briem frá Ferðamálastofu.

Gistihúsið Narfastöðum er 43 herbergja fjölskyldurekið gistihús syðst í Reykjadal á milli Húsavíkur og Mývatns. Í umhverfi gistihússins er umfangsmikil skógrækt, fjölbreytt fuglalíf og fornminjar en verið er að leggja lokahönd á merktar gönguleiðir sem gefa ferðamönnum kost á að kynnast menningarsögunni á nýjan hátt. Gistihúsið Narfastöðum hlaut viðurkenningu Vakans sem 4ra stjörnu gistiheimili og gull umhverfismerki fyrir áherslu sínar í sjálfbærni og umhverfismálum. Gestgjafar á Narfastöðum eru þau Unnsteinn og Rósa en gistihúsið hefur verið rekið undir merkjum Ferðaþjónustu bænda frá árinu 1987, þegar faðir Unnsteins, Ingi Tryggvason hóf reksturinn.

Brunnhóll á Mýrum

Brunnhóll á Mýrum

Á mynd frá vinstri: Sigurlaug Gissurardóttir og Jón Kristinn Jónsson ferðaþjónustubændur á Brunnhóli.

 
Gistiheimilið Brunnhóll hefur verið rekið af Sigurlaugu Gissurardóttur og Jóni Kristni Jónssyni undir merkjum Ferðaþjónustu bænda frá árinu 1986. Í dag er boðið upp á gistingu í 22 herbergjum og veitingasölu auk hins margrómaða Jöklaíss sem framleiddur er á staðnum. Gistiheimilið Brunnhóll hlaut viðurkenningu sem fjögurra stjörnu gistiheimili og brons umhverfismerki Vakans.

 

Sólheimahjáleiga í Mýrdal

Sólheimahjáleiga í Mýrdal

Á mynd frá vinstri: Áslaug Briem frá Ferðamálastofu, Jónas Marinósson, Elín Einarsdóttir og Einar Freyr Elínarson ferðaþjónustubændur á Sólheimahjáleigu og Alda Þrastardóttir frá Ferðamálastofu, 

Sólheimahjáleiga er fjölskyldurekið gistihús og sveitabær sem leggur áherslu á friðsælt umhverfi fyrir gesti í nálægð við náttúru og búskap. Sama fjölskyldan hefur byggt upp staðinn frá 1850 og boðið upp á gistingu undir merkjum Ferðaþjónustu bænda frá árinu 1985. Sólheimahjáleiga hlaut viðurkenningu sem fjögurra stjörnu gistiheimili innanVakans en alls er boðið upp á gistingu í 19 herbergjum á Sólheimahjáleigu.  

Við hjá Ferðaþjónustu bænda óskum öllum þremur gististöðunum innilega til hamingju með þennan glæsilega árangur.

 

First article
comments powered by Disqus