Gistiaðstaða
Eins og tveggja manna herbergi með handlaug og fatahengi í sérhúsi með tveimur sameiginlegum baðherbergjum. Matsalur/dagstofa. Séríbúð með tveimur svefnherbergjum (hjónaherbergi og annað herbergið með tveimur stökum rúmum og pláss fyrir eitt aukarúm), stofu með svefnsófa, eldhúsi og baðherbergi.
Veitingar/máltíðir
Gestir hafa aðgang að eldhúsi frá kl. 7-22 alla daga. Hver og einn sér um sínar máltíðir sjálfur.
Þjónusta/afþreying
Þvottavél tl afnota fyrir gesti. Verönd með garðhúsgögnum. Skemmtilegar gönguleiðir. Margir áhugaverðir staðir í nágrenninu. Skipulagðar gönguferðir með leiðsögumönnum. Næsta þéttbýli með matvöruverslun, veitingastöðum, sundlaug og ýmissi þjónustu við ferðamenn er á Kirkjubæjarklaustri (25 km).
Heiðalönd, jökulfljót og mosavaxið hraun
Bærinn Dalshöfði stendur undir heiðarbrún 5 km frá þjóðvegi 1. Heiðar og fjalllendi upp af bænum eru áhugavert göngusvæði. Skammt frá bænum fellur jökulsáin Hverfisfljót sem verður mjög vatnsmikið á sumrin; eftirminnilegt að ganga fram með eða upp með fljótinu í sumarvexti. Uppi á hálendinu norður af Dalshöfða er mikilfenglegur foss í Hverfisfljóti, Lambhagafoss, og fyrir neðan hann flúðir og minni fossar. Gegnt Dalshöfða, hinum megin við fjótið, er Eldhraun, eystri hraunkvíslin sem rann í Skaftáreldum árið 1783.
Dverghamrar, Fjaðrárgljúfur, Lakagígar
Tilvalið er að aka í vestur að Kirkjubæjarklaustri (25 km) og staldra við á leiðinni í Dverghömrum, sérstæðum stuðlabergsklettum. Frá Kirkjubæjarklaustri eru í boði yfir sumarið skipulagðar gönguferðir um nágrennið. Af áhugaverðum stöðum á þessum slóðum má nefna Fjaðrárgljúfur, skammt frá þorpinu. Uppi á hálendinu ofan við byggðina eru Lakagígar, röð gosgíga á 25 km langri eldsprungu sem gaus í Skaftáreldum 1783 (60 km frá Dalshöfða). Lakagígar eru einstakt náttúruvætti á heimsvísu.
Skaftafell og Jökulsárlón
Frá Dalshöfða er 45 km akstur í austur yfir Skeiðarársand í Skaftafell, einn vinsælasta ferðamannastað í Vatnajökulsþjóðgarði, yndislega gróðurvin og náttúruperlu í stórbrotnu umhverfi hvassbrýndra tinda og jökla. Frá Skaftafelli eru svo um 60 km að Jökulsárlóni þar sem tröllauknir jakar brotna í sífellu úr skriðjökli og bráðna síðan smám saman á floti í lóninu. Fólki gefst kostur á að sigla um lónið og kynnast þannig betur þessari síbreytilegu listasmíð náttúrunnar.
Gestgjafar: Baldur og Díana