Gistiaðstaða
Fjögur snyrtilega búin tveggja manna herbergi með sérbaði í sérálmu heima á bænum. Frítt þráðlaust netsamband er í öllu húsinu.
Veitingar
Morgunverður er innifalinn í verði og er hann borinn fram á Sveitasetrinu Hofsstöðum sem er í 450 m fjarlægð frá bænum. Þar er einnig að finna veitingastað og bar þar sem boðið er upp á heimilislegan mat með áherslu á hráefni úr héraðinu.
Afþreying og þjónusta
Gönguferðir. Fjallgöngur. Sundlaugar á Sauðárkróki (18 km) og í Hofsós (26 km). 9 holu golfvöllur á Sauðárkróki. Sigling og ganga upp á hamraeyna Drangey sem blasir við frá Hofsstöðum (farið á sumrin frá Reykjum, bæ á ströndinni skammt norður af Sauðárkróki). Hestaleiga og flúðasigling. Byggðasafn. Skíðasvæði skammt frá Sauðárkróki er opið á vetrum. Verslanir og öll almenn þjónusta á Sauðárkróki (18 km frá Hofsstöðum).
Fljótsniður og fjallaloft
Frá Hofsstöðum er tilvalið að bregða sér í gönguferðir til þess að komast í snertingu við náttúruna og njóta útsýnis yfir héraðið. Merkt gönguleið er frá sveitahótelinu á Hofsstöðum (500 m frá bænum) niður á bakka jökulfljótsins, Eystri-Héraðsvatna, og síðan út með eylendinu við kvíslar fljótsins þar sem er auðugt fuglalíf. Á fjallið fyrir ofan bæinn eru tvær stikaðar gönguleiðir. Af fjallinu er mikið útsýni yfir Skagafjörð og ógleymanlegt að horfa þar á miðnætursólina ganga til viðar.
Í fótspor biskupa og alþýðufólks
Einn kunnasti sögu- og menningastaður á Íslandi, Hólar í Hjaltadal, eru í aðeins 20 km akstur frá Hofsstöðum. Þar var biskupssetur fyrir norðan¬vert Ísland í nærri 7 aldir. Í hugum Íslendinga hvílir enn helgi yfir þessum stað í hlýlegum, þröngum fjalladal. Þar má skoða elstu steinkirkju landsins, frá 1763. Í Hofsós (26 km) er Vesturfarasetur, safn um Íslendinga sem fluttust til Vesturheims á s.hl. 19. aldar. Í Hofsós er sundlaug á sjávarbakka með ein¬stöku útsýni yfir fjörðinn.
Gamlir tímar, dalir og gljúfrabúar
Hofsstaðir eru kjörinn staður til skoðunarferða um Skagafjörð. Í Glaumbæ (30 km) er byggðasafn í stórum íslenskum torfbæ eins og þeir gerðust reisulegastir á seinni hluta 19. aldar. Syðst í héraðinu eru framsveitir Skagafjarðar, heillandi slóðir fyrir útvistarfólk og náttúruunnendur. Þar, frá Bakkaflöt í Steinsstaðabyggð (11 km frá Varmahlíð), gefst kostur á að fara í 3 klst. flúðasiglingu sem hentar öllum að prófa (aldurslágmark 12 ár). Hestaleiga er á Lýtingsstöðum sem eru um 5km framar en Steinsstaðabyggð.
Gestgjafar: Þórólfur og Guðný.