Gistiaðstaða

Herbergi með sérbaði í nokkrum byggingum við þjónustuhúsið. Tveggja manna herbergi, fjölskylduherbergi og herbergi með aðgengi fyrir fatlaða. 

Þjónusta

Í Dæli er hugguleg sveitakrá/kaffihús með bar, Kaffi Sveitó, þar sem má fá máltíðir og léttar veitingar.  Matsalur fyrir 60 manns. 

Afþreying

Hægt að fá veiðileyfi í hópið; Bergána, Víðidalsá ofan kolufossa og þá eru mörg vötn upp á Víðidalstunguheiði. Skemmtilegar mínigolfbrautir fyrir unga sem aldna; kylfur leigðar út á staðnum. Heitur pottur og gufubað í litlu baðhúsi. Næsta sundlaug er á Hvammstanga (24 km). Næsti golfvöllur er við Blönduós (41km). Næsta verslun á Hvammstanga.

Gönguleiðir á slóðum trölla

Frá Dæli liggur merkt gönguleið (1-1,5 km) að fossi með steinbrú yfir sem nefnist Steinbogi. Skemmtileg 5 km gönguleið er að Kolugljúfrum. Þar rennur Víðidalsá, ein þekktasta og besta laxveiðiá landsins, um stórbrotin gljúfur sem eru nokkrir tugir metra á dýpt. Tröllskessan Kola er sögð hafa grafið gljúfrin og átt þar síðan bústað. Í gljúfrunum eru Kolufossar.

Stefnumót við landseli

Frá Dæli er ekki langt að aka að vegamótum þar sem byrjar hringvegur (90 km) um Vatnsnes, hálendan skaga á milli Húnafjarðar að austan og Miðfjarðar að vestan. Þar eru ein aðgengilegustu og stærstu selalátur á Íslandi. Skoða má landseli í töluverðu návígi og ná af þeim góðum myndum í náttúrulegu umhverfi. Hjá bæjunum Illugastöðum, Svalbarði og Ósum hefur verið byggð upp aðstaða til selaskoðunar. Fræðast má svo nánar um seli og selveiðar í Selasetri Íslands í þorpinu Hvammstanga við Miðfjörð.

Áhugaverðir staðir og söguslóðir

Við hringveginn kringum Vatnsnes eru tvær furðusmíðar náttúrunnar, Borgarvirki og Hvítserkur, sérkennilegur, brimsorfinn 15 m hár klettur. Börn hafa gaman af því að ganga niður í fjöruna til að skoða klettinn. Frá Dæli er einnig tilvalið að aka yfir í næsta dal fyrir austan, Vatnsdal, og skoða t.d. Vatnsdalshóla.

 
Gestgjafar:  Kristinn Rúnar og fjölskylda