Gistiaðstaða
Á gistiheimilinu eru fimm tveggja manna herbergi og eitt þriggja manna herbergi með sérbaði. Auk þess eru 4 herbergi með handlaug og deila baðherbergi, þ.e. eitt eins manns, tvö tveggja manna og eitt þriggja manna herbergi. Sameiginleg borð- og setustofa.
Veitingar/máltíðir
Morgunverðarhlaðborð á hverjum degi kl. 8-10. Veitingastaðir og matvöruverslun í Vík í Mýrdal (10 mín. akstur frá Skeiðflöt).
Þjónusta/afþreying
Gönguleiðir í grennd við Skeiðflöt og t.d. um áhugaverðar slóðir í fjalllendinu ofan við byggðina undir Mýrdalsjökli. Fuglaskoðun. Hestaferðir frá tveimur bæjum í nágrenninu. Völlum (4 km) og Mið-Hvoli (4 km). Vélsleðaferðir á Sólheimajökul, jöklaganga og ísklifur (17 km). Skógafoss og fjölbreytt og skemmtilegt byggða- og samgöngusafn á Skógum (19 km). Næsta þéttbýli með sundlaug, verslun og góðum matsölustöðum: Vík í Mýrdal (14 km). Hjá Vík er 9 holu golfvöllur.
Skeiðflöt, dvalarstaður með ótal ferðamöguleika
Á Skeiðflöt var stundaður hefðbundinn búskapur svo öldum skipti en nú er bærinn við fjölförnustu leið ferðamanna meðfram suðurströnd Íslands og kjörinn dvalarstaður þeirra sem vilja upplifa einstakar náttúruperlur í Mýrdal og næstu byggðum. Hvort sem fólk hefur áhuga á gönguferðum í stórbrotinni náttúru, miserfðiðum fjallgöngum, fuglaskoðun, jöklaferðum eða skoðunarferðum á bíl um töfraheima íslenskrar náttúru miðsvæðis við ströndina á Suður-Íslandi er Skeiðflöt tilvalinn dvalarstaður í lengri eða skemmri tíma.
Dyrhólaey, Reynisfjara
Í nokkurra mínútna akstur frá Skeiðflöt er Dyrhólaey (10 km), friðlýstur höfði með standbjörgum sjávarmegin og auðugu fuglalífi á sumrin, einn fjölsóttasti viðkomustaður ferðamanna í Mýrdal. Eilítið austar er Reynisfjara (16 km) þar sem svarrandi úthafsalda fellur á svartan sand undir sérstæðum stuðlabergsmyndunum og hellisskútum en eilítið utar rísa steinrunnin tröll upp úr djúpinu.
Sólheimajökull, Mýrdalsjökull
Um 17 km frá Skeiðflöt er komið að rótum lengsta skriðjökuls á Íslandi, Sólheimajökuls, þar sem hann skríður niður frá Mýrdalsjökli. Þarna má líta tröllaukna fegurð jöklanna og um leið sjá óhrekjanlegan vitnisburð um hnattræna hlýnun. Ferðaþjónustan á Ytri-Sólheimum (10 km) býður vélsleðaferðir og ferðir á sérbúnum jeppum á Mýrdalsjökul. Einnig eru í boði jökulgöngur og ísklifur með leiðsögumanni.
Skógafoss, Seljalandsfoss, áhugavert byggðasafn
Eyjafjallajökull, eldfjallið sem komst í heimsfréttir vorið 2010, blasir við frá Skeiðflöt. Við austurrætur fjallanna undir jöklinum er Skógafoss (20 km), undurfagur og frægur að verðleikum. Seljalandsfoss, annar kunnur foss, er 28 km vestar og liggur leiðin um landsvæði sem á engan sinn líka í veröldinni. Á Skógum (20 km) er eitt besta minja- og samgöngusafn á Íslandi þar sem má kynnast lífi og aðstæðum íbúa í þessum landshluta á síðari hluta 19. og fyrri hluta 20. aldar og hvernig bættar samgöngur og sífellt betri fjarskipti gjörbreyttu mannlífi á sögueyjunni þegar tæknibyltingin hélt innreið sína fyrir rétt rúmri einni öld.