Stekkjardalur við Svínavatn



Stekkjardalur við Svínavatn

Gisting í einbýlishúsi á bænum Stekkjardal, yst í Sléttárdal upp af suðausturenda Svínavatns í Húnaþingi eystra á vestanverðu Norðurlandi. Í Stekkjardal er stundaður almennur búskapur með kýr, hross og sauðfé og gefst þar færi á að fá nasasjón af daglegu lífi á íslenskum bóndabæ. Stekkjardalur liggur vel við ökuleiðinni yfir Kjöl, fjölfarnasta veginum yfir miðhálendi Íslands. Opið allt árið.

Frá:14.000kr
hver nótt
Veldu dagsetningar
Senda fyrirspurn

Þjónusta

  • Bústaður
  • Hefðbundinn búskapur
  • Frítt netsamband
  • Eldunaraðstaða
  • Þvottaaðstaða
  • Uppþvottavél
  • Opnir miðar

Í nágrenni

  • Kjölur hálendisvegur
  • Sundlaug Húnavellir 17 km
  • Blönduós 25 km
  • Veitingastaðir og sundlaug á Blönduósi
  • Þingeyrarkirkja 37 km

Gistiaðstaða

Gisting í íbúðarhúsi fyrir ofan hlaðið á bænum í Stekkjardal. Húsið er rúmgott, á tveimur hæðum, 4 svefnherbergi, 2 stofur og eldhús. Sjónvarp, þvottavél, þurrkari og frystir. Þráðlaust netsamband. Í afgirtum sérgarði á bak við húsið er útigrill. Húsið er leigt út í heilu lagi. Tilvalið fyrir fjölskyldur eða vinahópa.

Afþreying

Í Svínavatni er töluverð silungsveiði og veiðileyfi í vatninu er innifalið í gistingu sumar og vetur. Í nágrenninu eru margar helstu veiðiár og vötn landsins sem bjóða uppá fjölbreytta veiðimöguleika. Á Blönduósi er frábær sundlaug með vatnsrennibrautum, heitum pottum og gufubaði (25 km). Fjár- og stóðréttir eru í Auðkúlurétt á haustin (200 m). Landið í kring er þægilegt til styttri gönguferða. Næsta verslun er á Blönduósi (25 km). Skíðasvæðið í Tindastóli við Sauðárkrók er í innan við klukkutíma akstursfjarlægð. Boðið er uppá flúðasiglingar við hæfi hvers og eins í nágrenninu. Golfvöllur er við Blönduós og þar er einnig starfrækt hestaleigan Galsi. Á Blönduósi eru einnig áhugaverð söfn s.s. Laxasetur Íslands, Eyvindarstofa, Heimilisiðnaðarsafnið og Hafíssetrið.

Íslensk sveit að sumri og vetri

Sléttárdalur er grösugur dalur sem gengur fram á heiðalönd upp af einu blómlegasta landbúnaðarhéraði á Íslandi. Frá Stekkjardal liggja leiðir til allra átta um þessar sagnaríku slóðir. Víða eru áhugaverðir staðir fyrir ferðamenn og landslag hlýlegt í dölum milli gróinna hálsa og fjalla þar sem glitrandi laxveiðiár renna til sjávar. Á vetrum fær landið annað svipmót. Á heiðskírum vetrarkvöldum gefst oft tækifæri til að sjá norðurljósin dansa yfir snævi þöktum tindum. 

Áhugaverðir staðir í nágrenninu

Af kunnum stöðum innan hæfilegrar ökuseilingar frá Stekkjardal má nefna Vatnsnes, milli Miðfjarðar og Húnafjarðar, þar sem eru ein stærstu selalátur á Íslandi. Við hringleiðina um Vatnsnes má einnig sjá Hvítserk, eitt af kunnustu kennileitum íslenskrar náttúru, brimsorfinn klett í fjöruborði. Í Vatnsdal eru Vatnsdalshólar sem mynduðust í miklu berghlaupi áður en land byggðist.

Hveravellir er jarðhitasvæði norðan undir Kjalhrauni, eitt af stærstu hverasvæðum landsins. Frægasti útilegumaður Íslands, Fjalla Eyvindur, dvaldist þar um skeið ásamt Höllu konu sinni. Á Hveravöllum er að finna náttúrulegan heitan pott.

Hrútey er skrautfjöður í hatti Blönduóssbæjar, umlukin jökulánni Blöndu og skartar fjölbreyttum gróðri og fuglalífi. Á Þingeyrum stendur ákaflega sérstök og fögur kirkja byggð úr steini, vígð 1877.

Kálfshamarsvík er lítil vík á norðanverðum Skaga. Þar eru sjávarhamrar úr fallega formuðu stuðlabergi er myndaðist fyrir u.þ.b. tveimur milljónum ára, sérkennileg náttúrusmíð.

Gestgjafar: Ægir og Gerður

 

In the area