Steig, Mýrdalur



Steig, Mýrdalur

Hlýlegt gistihús bænda á bænum Steig í Mýrdal, undir brekkurótum með útsýni til hafs og jökla, 1,5 km frá þjóðvegi 1 skammt frá suðurströnd Íslands undir Mýrdals- og Eyjafjallajökli. Herbergi með sér- og sameiginlegu baðherbergi. Rúmgott eldhús. Máltíðir í boði. Merktar gönguleiðir og fjölbreyttir útvistarmöguleikar. Góð staðsetning til skoðunarferða í Mýrdal og undir Eyjafjöllum. Opið allt árið.

Frá:12.800kr
hver nótt
Veldu dagsetningar
Senda fyrirspurn

Þjónusta

  • Sameiginlegt baðherbergi með vaski
  • Sér baðherbergi
  • Frítt netsamband
  • Máltíðir í boði
  • Eldunaraðstaða
  • Þvottaaðstaða
  • Kreditkort
  • Merktar gönguleiðir
  • Útsýni til jökuls
  • Opnir miðar

Í nágrenni

  • Mýrdalsjökull 
  • Dyrhólaey 10 km
  • Jarðhitasundlaug og golf í Vík 14 km
  • Snjósleðaferðir á Sólheimajökul, jöklagöngur og ísklifur 17 km
  • Reynisfjara 18 km
  • Skógafoss 20 km
  • Skógar byggðasafn 20 km

Gistiaðstaða

12x2 manna herbergi (hægt að bæta við aukarúmi) með sérbaðherbergi. Hægt að fá barnarúm. Eitt herbergi með aðgengi fyrir hreyfihamlaða. 4x2 manna herbergi (í eldri hluta byggingarinnar), uppbúin rúm og/eða svefnpokapláss, með handlaug og tveimur sameiginlegum baðherbergjum. Setustofa með sjónvarpi og rúmgott eldhús til afnota fyrir gesti. Matstofa (hægt að fá háa barnastóla). Aðgangur að tölvu með ókeypis netsambandi. Þvottaaðstaða.

 
Veitingar/máltíðir

Morgunverður er innifalinn í gistiverði. Kvöldverður í boði á sumrin ef pantað er fyrirfram. Rúmgott og vel búið eldhús til afnota fyrir gesti. Næsta matvöruverslun í þorpinu Vík í Mýrdal (16 km). Nokkrir matsölu- og veitingastaðir á svæðinu.

 
Þjónusta/afþreying

Gönguleiðir í grennd við Steig og víðar í Mýrdal. Hestaferðir frá tveimur bæjum í sveitinni, Völlum (6 km) og Mið-Hvoli (6 km). Vélsleðaferðir á Sólheimajökul, jöklagöngur og ísklifur (17 km). Skógafoss og fróðlegt og skemmtilegt byggðasafn á Skógum (20 km). Næsta þéttbýli með sundlaug, verslun og matsölustöðum: Vík í Mýrdal (16 km). Hjá Vík er 9 holu golfvöllur. Á Steig er stundaður búskapur með sauðfé og íslenskar hænur. Hundurinn á bænum fylgist með gestakomum.

 
Paradís göngufólks, leiðir við allra hæfi

Hjá Steig lá áður alfaraleið svo öldum skipti upp frá bænum um byggðirnar á milli sandanna sem jökulár frá Mýrdalsjökli hafa myndað og eru enn að bæta við. Leiðin var af lögð í upphafi bílaaldar en enn má sjá móta fyrir sneiðingum upp hálsinn ofan við Steig. Hér er freistandi að setja á sig gönguskó og kanna heiðalöndin, hálsa, gil og dalskvompur á Steigarhálsi og upp frá honum. Í norður frá bænum rís Búrfell sem fjallgöngufólki þykir verðugt að reyna sig við. Af öðrum gönguslóðum í Mýrdal má nefna svæðið upp frá Höfðabrekku (5 km austur af Vík), ævintýraheim fyrir þá sem vilja njóta hlýlegrar og um leið stórbrotinnar íslenskrar náttúru.

 
Lundabyggð í Dyrhólaey, Reynisfjara

Dyrhólaey (10 km), friðlýstur höfði með standbjörgum sjávarmegin og auðugu fuglalífi á sumrin, er einn helsti viðkomustaður ferðamanna í Mýrdal. Eilítið austar með ströndinni er Reynisfjara (18 km) þar sem úthafsalda fellur á svartan sand undir sérstæðum stuðlabergsmyndunum og hellisskútum; staður sem býr yfir miklu seiðmagni.

 
Sólheimajökull, ferðir á Mýrdalsjökul

Sólheimajökull, lengsti skriðjökull á Íslandi, ryður sér leið frá ísskildi Mýrdalsjökuls niður á láglendið (17 km að jökulrótum frá Steig). Ferðaþjónustan á Ytri-Sólheimum (10 km) býður vélsleðaferðir og ferðir á sérbúnum jeppum á Mýrdalsjökul. Einnig eru í boði jökulgöngur með leiðsögumanni og ísklifur fyrir fótliðuga og handsterka fullhuga.

 
Skógafoss, Seljalandsfoss, áhugavert byggðasafn

Jökullinn, sem lét flugfarþega finna fyrir mætti sínum vorið 2010, Eyjafjallajökull, blasir við frá Steig. Við austurrætur hans er Skógafoss (20 km), undurfagur og frægur að verðleikum. Seljalandsfoss, annar kunnur foss, er 28 km vestar og liggur leiðin um hrífandi og stórbrotið landslag. Á Skógum (20 km) er fjölbreytt minja- og byggðasafn sem öll fjölskyldan hefur ánægju af að skoða.

Gestgjafar: Ásrún og Ólafur. 

 

In the area