Fagravík - Aurora Vacation Homes



Fagravík - Aurora Vacation Homes

Þrettán sumarhús, tveggja til níu manna hús við Fögruvík nær innst við Eyjafjörð, skammt utan við Akureyri. Húsin standa á snotrum stað við sjóinn. Fallegt útsýni til hafs og fjalla. Fuglalíf, stangveiði af klöppum, skemmtilegar gönguleiðir. Aðeins 5 mín. akstur í iðandi mannlíf á Akureyri. Margar kunnustu náttúruperlur á Norðurlandi innan seilingar í hæfilegum dagsferðum. Opið allt árið.

Frá:14,100 EURkr
hver nótt á herbergi
Veldu dagsetningar
Senda fyrirspurn

Þjónusta

  • Bústaður
  • Hefðbundinn búskapur
  • Heitur pottur
  • Eldunaraðstaða
  • Þvottaaðstaða
  • Útsýni til sjávar

Í nágrenni

  • Gönguleiðir og fuglaskoðun
  • Hestaferðir 1,5 km
  • Gásir 
  • Akureyri 5km
  • Hvalaskoðun
  • Sundlaug, söfn og veitingastaðir á Akureyri 

Gistiaðstaða

Gisting í velbúnum sumarhúsum. Í boði eru 3x2ja manna hús með 1 svefnherbergi. 6x5 manna hús með 2 svefnherbergjum, 1x6 manna hús með 3 svefnherbergjum, 2x9 manna hús með 3 svefnherbergjum, 1x8 manna rúmgott hús með 4 svefnherbergjum. Í öllum húsunum er baðherbergi með sturtu, eldhúskrókur eða eldhús, borð- og setustofa með sjónvarpi og útvarpi. Heitur pottur er við öll húsin.

 
Veitingar/máltíðir

Gestir sjá sjálfir um matseldina. Góðar matvöruverslanir, matsölu- og veitingastaðir er á Akureyri (5 km).

 
Þjónusta/afþreying

Stangaveiði af klöppunum í víkinni án endurgjalds. Gestum stendur líka til boða á sumrin að veiða lax eða silung úr lítilli veiðitjörn og greiða fyrir aflann. Leiksvæði fyrir börn. Skemmtilegar gönguleiðir. Hestaferðir (1,5 km). Sundlaugar á Akureyri (5 km) og Þelamörk (10 km). 18 holu golfvöllur (Jaðarsvöllur) á Akureyri. Úrval verslana, veitingastaða og skemmtistaða á Akureyri þar sem eru líka áhugaverð söfn og marvísleg þjónusta við ferðamenn. Eitt kunnasta og vinsælasta skíðasvæði á Íslandi er í Hlíðarfjalli, skammt ofan við Akureyri.

 
Akureyri – höfuðstaður Norðurlands

Akureyri er hlýlegur bær í fallegu umhverfi sem gegnir lykilhlutverki á flestum sviðum í þjónustu, atvinnu- og menntamálum í þessum landshluta. Þar er gaman að staldra við, rölta um miðbæinn og kynnast mannlífi og menningu sem eru mun fjölbreyttari og þróttmeiri en ætla mætti að óreyndu á ekki fjölmennari stað. Á Akureyri er Nonnahús, safn á æskuheimili paters Jóns Sveinssonar eða Nonna (1857-1944), höfundar barnabóka sem nutu fádæma vinsælda víða um heim á fyrstu áratugum 20. aldar.

 
Eyjafjarðarsveit – Laufás – Svarfaðardalur - Siglufjörður

Sveitin inn af Eyjafirði, langur, breiður og grösugur dalur milli aflíðandi hlíða og blárra fjallatinda, er blómlegt hérað. Aka má hring um sveitina, fram og út eftir dalnum, og er falleg leið á sólríkum degi. Út með strönd Eyjafjarðar, austan megin, er þekkt byggðasafn í reisulegum íslenskum torfbæ í Laufási (36 km). Sé haldið í norður frá Fögruvík, út með firðinum vestan megin, má t.d. aka hringveginn um Svarfaðardal (38 km), töfrandi dal í faðmi hárra fjalla. Til „síldarbæjarins“ Siglufjarðar, nyrsta þéttbýlis á Tröllaskaga og ferðamannastaðar, sem nýtur stöðugt meiri vinsælda, eru 75 km frá Fögruvík.

 
Mývatnssveit – Goðafoss - hvalaskoðunarferðir

Frá Fögruvík er hæfileg dagsferð að bregða sér austur í næsta hérað og njóta þess að heimsækja margar af kunnustu náttúruperlum Íslands í Mývatnssveit (102 km), t.d. Dimmuborgir, Hverfjall og Námaskarð. Á leiðinni þangað er sjálfsagt að skoða og láta taka myndir af sér við Goðafoss (57 km), einn af kunnustu fossum á Íslandi. Frá Húsavík (48 km frá Goðafossi, 105 km frá Fögruvík) eru í boði hvalaskoðunarferðir, upplifun sem aldrei gleymist.

Gestgjafar: Soffía og Eiríkur

 

In the area