Gönguferð á Arnarvatnsheiði │ Hraun - Hellar - Heiði



Gönguferð á Arnarvatnsheiði │ Hraun - Hellar - Heiði

Ferðabændur á Brekkulæk hafa í rúm 35 ár skipulagt gönguferðir yfir Arnarvatnsheiði fyrir erlenda ferðamenn. Nú stendur göngufólki til boða að koma í svona ferð í samstarfi við Hey Ísland og kynnast einu fáfarnasta svæði landsins.
Um er að ræða þriggja skóa gönguferð á vegleysum með einhvern farangur á bakinu. Gönguleiðin liggur upp með Norðlingafljóti, með Hallmundarhraun á hægri hönd og víðerni Arnarvatnsheiðar og Tvídægru á vinstri hönd. Yfir öllu gnæfir Eiríksjökull, en Langjökull líður fram hjá frá austri og hverfur sjónum inn í Jökulkróki. Gengið verður í eina fegurstu náttúrusmíð landsins, gíginn Hallmund efst í Hallmundarhrauni, og einnig upp á jökulstallana vestan Langjökuls. Síðan liggur leiðin norðvestur Arnarvatnsheiði, einu stærsta votlendissvæði landsins. Vatnaskilum er fylgt og gengið um þurrlendi. Veitt í matinn og nærst á gjöfum jarðar.

Útihátíðir og umferðaröngþveiti eru víðsfjarri, en óbyggðakyrrð og víðerni miðhálendisins bjóða upp á einstaka upplifun um Verslunarmannahelgina.

Gist er í skálum og þar bíða vistir. Ekki þarf að bera neinn mat.

Fararstjóri: Maríus Þór Jónasson

27. júlí - 2. ágúst 2021

Veldu dagsetningu
Frá:kr.
á mann / hver dvöl
Bóka

Innifalið

  • Akstur frá Reykjavík á fyrsta degi og til baka á síðasta degi
  • Gisting í 5 nætur í fjallaskálum
  • Matur (6x kvöldverður, 5x morgunverður, 5x nesti)
  • Veiði
  • Sund
  • Fararstjórn

Taktu með

  • Gönguskó
  • Bakpoka
  • Svefnpoka
  • Hlífðarfatnað
  • Húfu og vettlinga
  • Vaðskó
  • Flugnanet
  • Bitabox og drykkjarflösku

Ferðalýsing

28. júlí │ miðvikudagur

Brottför kl. 9:00 frá BSÍ. Ekið fram hjá Húsafelli. Surtshellir skoðaður á leiðinni að Norðlingafljóti. Farangur fluttur í náttstað. Gengið í Álftakrók og þar bíður hópsins heitur matur. Gist í gangnamannakofa.

  • 9 km

29. júlí │ fimmtudagur

Gengið um vegleysur milli vatna að gangnamannakofa í Fljótsdrögum. Gist í tvær nætur.

  • 18 km

30. júlí │ föstudagur

Gengið upp í gíginn Hallmund, sem Hallmundarhraun rann úr fyrir um 1100 árum og ef veður leyfir upp á Jökulstalla utan í Langjökli.

  • 18 km
Opna allt

31. júlí │ laugardagur

Gengið frá Fljótsdrögum yfir Langajörfa og „lágan hvannamó“, yfir Skammá, milli Réttarvatns og Arnarvatns og með fram Sesseljuvík að Lónaborg við Grandalón og gist þar í tvær nætur.

  • 20 km

1. ágúst │ sunnudagur

Dvalið í fjallaskálanum, veiðum í matinn, fylgjumst með fuglalífi og heimsfriðnum andað að sér. Veiðin grilluð.

2. ágúst │ mánudagur

Gengið um 7 km leið upp á veginn sem liggur frá Arnarvatni stóra niður í Miðfjörð. Rúta ekur hópnum í sund á Hvammstanga. Eftir veglega máltíð á Brekkulæk í Miðfirði er ekið til Reykjavíkur.

 

í nágrenni