Vor í sveitinni



Vor í sveitinni

Eftir langan vetur vaknar okkar töfrandi land og náttúra aftur til lífsins með fallegum lækjum, líflegum fuglum og nýfæddum lömbum. Dvalið verður í þrjár nætur í Brekkulæk í Miðfirði en það er gróið landbúnaðarhérað þar sem gestgjafarnir búa með 70 hrossum og hundinum Leó. Einn af hápunktunum er ferð norður á Skaga, þar sem æðarbóndinn Vignir kynnir fyrir okkur heillandi umhverfið og fer með okkur á báti út í litla eyju þar sem finna má þúsundir fugla, lundabyggð og stórt æðavarp. Við munum líka heimsækja Vatnsnes sem er hálendur skagi milli Miðfjarðar og Húnafjarðar, þekktur fyrir stór selalátur. Einnig munum við aka út á Strandir en ferðina endum við síðan á Reykhólum. Á þessum stöðum er hægt að sjá stóran hluta af fuglafánu Íslands. Við munum ferðast með lítilli rútu, með báti og gangandi og slaka á í heitum pottum þess á milli. Einnig gefst ágætis tækifæri til að taka ljósmyndir af fuglum. 

Dagsetning í boði: 27. - 31. maí 2021

Ef bókað er tveggja manna herbergi þá eru fyrstu þrjár næturnar í herbergjum með sérbaði og síðasta nóttin í herbergi með sameiginlegu baði. Ef eins manns herbergi er bókað þá eru allar nætur með sameiginlegu baði. 

Lágmarksþátttaka til að ferð verði farin er 6 manns og hámark 16. Fjórum vikum fyrir upphaf ferðar kemur í ljós hvort lágmarksþátttaka hefur náðst og þá verður ákveðið hvort ferð verður farin eða ekki.

Veldu dagsetningu
Frá:kr.
á mann / hver dvöl
Bóka

Hápunktar

  • Náttúruskoðunarferð
  • Sveitin og náttúran
  • Þúsundir fugla, lundabyggð og æðavarp
  • Selalátur

Innifalið

  • Gisting í tveggja manna herbergi, eins manns herbergi gegn 5.000 kr. aukagjaldi
  • Fæði eins og tiltekið er í ferðalýsingu 
  • Allur akstur

Leiðsögn

Leiðsögumaður verður Arinbjörn Jóhannsson ferðabóndi á Brekkulæk sem er öllum hnútum kunnugur í sveitinni. Arinbjörn er fuglaáhugamaður og náttúruunnandi frá æsku en hann hefur skipulagt og verið fararstjóri í fuglaskoðunarferðum fyrir útlendinga í 25 ár og m.a. séð um fuglaskoðunarferðir fyrir stór þýsk náttúruverndarsamtök NABU (Natur Bund).

Ferðalýsing

27. maí │ Reykjavík - Brekkulækur

Farið með rútu á okkar vegum frá Reykjavík. Brottför frá BSÍ kl.11:00, frá veitingastaðnum Sprengisandi kl. 11:15 og verðum við komin á Brekkulæk um kl. 15:00. Á leiðinni norður verður stutt stopp við fossinn Glanna þar sem við með nokkurri heppni verðum vör við einn minnsta fugl Íslands. Við komuna að Brekkulæk verður smá hressing en höldum því næst í smá gönguferð þar sem við kynnumst nærumhverfinu og heilsum upp á vorboðana. Kvöldmatur og gisting á Brekkulæk þar sem við gistum í 3 nætur. 

Innifalið

  • Kvöldverður

26. maí │ Arnarvatnsheiði - Vatnsnes

Vaknað við fuglasöng. Heiðlóur, stelkar, hrossagaukar, spóar, þúfutittlingar og skógarþrestir bjóða góðan dag. Að loknum morgunverði verður ekið inn til heiða og genginn spölur með gljúfri Austurár þar sem oft verpa í nábýli fálkar og heiðargæsir. Léttur hádegismatur á Brekkulæk. Ekið fyrir Vatnsnes og svipast um eftir sel, skoðaður heitur hver í flæðarmálinu. Lengra stopp hjá drangnum Hvítserk en umhverfis hann er mjög skemmtilegt vistkerfi þar sem kría, æðarfugl, tjaldur, fýll, teista og rita verpa í miklu nábýli. 

Innifalið:

  • Morgunverður
  • Hádegisverður
  • Kvöldverður

29. maí │ Skagi

Í dag er ferðinni heitið út á Skaga með viðkomu í Vatnsdalshólunum. Við skoðum okkur um í hinni fornu verstöð Kálfshamarsvík. Á vegi okkar verða: himbrimar, toppendur, óðinshanar, sanderlur, sendlingar, rauðbrystingar, tildrur og lóuþrælar. Við mælum okkur mót við æðarbóndann og þúsundþjalasmiðinn Vigni bónda í Höfnum á Skaga. Hápunktur dagsins verður, ef veður leyfir, bátsferð með Vigni út í eyju sem er ca 100 m frá landi. Á þessari smáeyju er stórt æðarvarp og lundabyggð. 

Innifalið:

  • Morgunverður
  • Nesti
  • Kvöldverður
Opna allt

30. maí │ Brekkulækur - Strandir - Reykhólar

Ekið fyrir Hrútafjörð og norður strandir, yfir Þröskulda að Reykhólum. Stutt stopp í Broddanesi og á Hólmavík. Á þessari leið verða á vegi okkar flórgoðar, straumendur og toppendur. Gist í gistihúsi á Reykhólum.

Innifalið:

  • Morgunverður
  • Kvöldverður

31. maí │ Reykhólar - Reykjavík

Að loknum morgunverði förum við í ca 4 klukkustunda gönguferð um einstaka fuglaparadís Reykhóla. Hér verpir m.a. mikill fjöldi hávella, skúfanda, dugganda og einkum lóma. Síðan ekið af stað til Reykjavíkur um Dali og Bröttubrekku. Að sjálfsögðu svipumst við um eftir örnum þegar ekið um Gilsfjörð. Komið til Reykjavíkur um kl. 18:00.

Innifalið:

  • Morgunverður
 

í nágrenni