Fossagangan er sannkölluð upplifunarganga meðfram Jökulsá, því á leiðinni er fjöldinn allur af fossum. Tilvalin byrjun á deginum er heimsókn í Óbyggðasetrið, áður en haldið er í gönguferðina sem hefst við eyðibýlið Kleif. Fljótlega eftir upphaf leiðarinnar er komið að lægsta fossinum, en eftir því sem líður á gönguna kemur hver fossinn á fætur öðrum í ljós. Þeir ævintýraþyrstu geta skorað lofthræðsluna á hólm og skellt sér með kláfnum yfir jökulána. Göngutími um 6 klst. og vegalengd 16 km. Eftir endurnærandi göngu er tilvalið að skella sér í heitu laugina, en þjóðsagan segir að vatnið hafi lækningamátt. 

Óbyggðasetrið stendur fyrir gönguferðunum um Fossaleiðina á tímabilinu 12. júní - 30. september.